11-son Bolalar musiqa va san’at maktabi — bu iste’dodlar ijod bilan nafas oladigan maskan! Samarqand viloyati, Pastdarg‘om tumanida joylashgan 11-son Bolalar musiqa va san’at maktabi — yarim asrdan ortiq tarixga ega, san’atga oshno qalblarni birlashtirib kelayotgan nufuzli ta’lim muassasasidir. Maktab 1963-yil 6-noyabrda san’at fidoyisi Anvar Raximovich Tursunov tashabbusi bilan, Charxin qo‘rg‘onidagi 55-sonli umumta’lim maktabi qoshida tashkil etilgan. 2012-yilda maktab to‘liq rekonstruksiya qilinib, ushbu jarayonga direktor Samatov Aktam Toirovich rahbarlik qilgan. Natijada o‘quvchilar uchun qulay va zamonaviy ta’lim muhitini yaratishga erishildi. 2013-yildan buyon esa maktabga Sharipov Xalim Raimovich rahbarlik qilib kelmoqda. Uning boshqaruvi ostida maktab faoliyati yangi bosqichga ko‘tarilib, ta’lim sifati va ijodiy yutuqlar ko‘lami kengayib bormoqda. 2025–2026 o‘quv yilida maktabimizda 254 nafar o‘quvchi tahsil olib, 11 xil yo‘nalish bo‘yicha o‘z iste’dodlarini rivojlantirmoqda. Jumladan: 🎹 Fortepiano sinfi; 🎷 Damli va zarbli cholg‘ular sinfi; 🎤 Estrada xonandaligi sinfi; 🪕 Xalq cholg‘ulari sinfi; 🎶 An’anaviy sozandalik sinfi; 🎵 An’anaviy xonandalik sinfi; 💃 Xoreografiya (raqs) sinfi; 🏞 Tasviriy sanʼat; 🧵 Amaliy san’at sinfi yoʻnalishlari oʻz faoliyatlarini olib borishmoqda. Maktabimizda har bir o‘quvchining qiziqishi va qobiliyatiga mos yo‘nalish tanlash imkoniyati mavjud. Maktabimizda oʻz kasbining mohir ustasi boʻlgan, professional va tajribali ustozlar, ijodiy muhit va sahna amaliyoti orqali o‘quvchilarimiz san’at sirlarini puxta oʻrganib, turli darajadagi tanlov va tadbirlarda munosib ishtirok etib kelmoqdalar. 11-son Bolalar musiqa va san’at maktabi — bu nafaqat ta’lim, balki iste’dodni kashf etish, uni rivojlantirish va kelajakka mustahkam poydevor yaratish maskanidir. Farzandingiz iste’dodini biz bilan kashf eting! 🎶

Bugun 2025-yil 13-dekabr kuni 11-son Bolalar Musiqa va San’at maktabida damli-zarbli cholg‘ular bo‘limining oyi munosabati bilan navbatdagi ochiq dars tashkil etildi. Mazkur ochiq dars klarnet sinfi o‘qituvchisi Toirov Feruz tomonidan o‘tkazildi. Dars jarayonida o‘quvchilarning klarnet cholg‘usidagi ijrochilik mahoratini rivojlantirish, to‘g‘ri nafas olish texnikasi, tovush chiqarish sifati hamda asarlarni badiiy talqin etish masalalariga alohida e’tibor qaratildi. Ochiq dars davomida zamonaviy pedagogik yondashuvlar va amaliy mashg‘ulotlar uyg‘un holda olib borildi. Mazkur tadbir pedagoglar o‘rtasida tajriba almashish, ta’lim sifatini oshirish hamda o‘quvchilarning ijodiy salohiyatini yanada rivojlantirishda muhim ahamiyat kasb etdi.

🎄✨Bugun 2025-yil 27-dekabr kuni 11-son Bolalar musiqa va sanʼat maktabimizda «OʻGʻIRLANMAGAN YANGI YIL» nomli ertak konser bayrami ko‘tarinki ruhda o‘tkazildi! ✨🎄 Bugungi Yangi yil bayrami quvonch, kulgu va iliq kayfiyatga boy tarzda o‘tdi. Bayram davomida bolajonlarning samimiy tabassumi, chiroyli raqslar, yoqimli qo‘shiqlar va qiziqarli sahna ko‘rinishlari barchamizga unutilmas lahzalarni tuhfa etdi. Yangi yil ruhini aks ettirgan bezaklar, bayramona muhit va ishtirokchilarning faol chiqishlari tadbirimizni yanada rang-barang va mazmunli qildi. Ushbu bayram barchamiz uchun bir yil davomida esda qoladigan go‘zal xotira bo‘lib qoldi. ✨ Kelayotgan «Yangi yil» har birimizga sog‘lik, baxt, tinchlik va yangi zafarlar olib kelsin!✨

Bugun 2026-yil 09 yanvar kuni 11-son Bolalar musiqa va san’at maktabida II-chorak yakunlariga bag‘ishlangan pedagogik kengash bo‘lib o‘tdi. Kengashda maktabda faoliyat olib borayotgan barcha bo‘lim va yo‘nalishlar kesimida ta’lim-tarbiya jarayoni yuzasidan hisobotlar tinglandi va muhokama qilindi. 🔴Pedagogik kengash davomida II-chorakdagi amalga oshirilgan ishlar tahlil etilib, aniqlangan yutuq va kamchiliklar yuzasidan tegishli xulosalar chiqarildi. Shuningdek, kelgusi choraklar uchun amalga oshirilishi rejalashtirilayotgan tadbirlar yuzasidan ish rejalar ishlab chiqildi. 🔴Jumladan, ta’lim jarayonini yanada takomillashtirish maqsadida seminarlar, ochiq darslar, mahorat darslari hamda sinf konsertlarini tashkil etish, dars mashg‘ulotlarida zamonaviy pedagogik texnologiyalar, ilg‘or metodlar va innovatsion yondashuvlarni qo‘llash masalalari muhokama qilindi. 🔴Kengash yakunida kelgusi choraklarda o‘quv jarayonini sifat jihatidan yaxshilash, o‘qitish samaradorligini oshirish va natijadorlikni ta’minlash bo‘yicha aniq vazifalar va tavsiyalar belgilab olindi.

Bugun, 8-dekabr — O‘zbekiston Respublikasining Konstitutsiya qabul qilingan kunida, bizning 11-son Bolalar Musiqa va San’at maktabimizda yurtimizning eng muhim tarixiy sanalaridan birini yuksak ruhda nishonladik. Ushbu qutlug‘ bayram munosabati bilan barcha ustozlarimizni, o‘quvchilarimizni, hamkasblarimizni, ota-onalarni hamda butun yurtdoshlarimizni samimiy tabriklaymiz! Konstitutsiya — mamlakatimiz taraqqiyoti, tinchlik va farovonlikning mustahkam poydevori. U xalqimizning huquq va erkinliklarini himoya qiluvchi bosh qonun sifatida yurtimiz hayotida beqiyos o‘ringa ega. Bayram munosabati bilan maktabimizda tashkil etilgan tantanali tadbir badiiy chiqishlar, kuy-qo‘shiqlar, raqslar ila yanada fayzli bo‘ldi. O‘quvchilarimiz jonli ijroda kuylagan qo‘shiqlar, milliy va zamonaviy yo‘nalishdagi raqslar, shuningdek, Vatan va Konstitutsiya madhiga bag‘ishlangan she’rlar barchada ko‘tarinki kayfiyat uyg‘otdi. Tadbirimizda Temuriylar maktabi bilan hamkorlikda ishtirok etilgan bo‘lib, ularning o‘quvchilari ham sahnaga chiqib, yurtga muhabbat va vatanparvarlik tuyg‘usi bilan yo‘g‘rilgan she’rlar ijro etdilar. Bu esa bugungi bayram tadbirining yanada mazmunli va rang-barang o‘tishiga sabab bo‘ldi. Shuningdek, o‘quvchilarimiz va faol ishtirokchilar faxriy yorliqlar bilan taqdirlandi, bu esa ularga kelgusida yanada yuqori marralar sari intilish uchun kuch va ishonch bag‘ishlaydi. Barchaga bayram muborak bo‘lsin! Yurtimiz osmoni doimo musaffo, Konstitutsiyamiz himoyasi kuchli, farzandlarimizning kelajagi porloq bo‘lsin! 🇺🇿

Bugun 2026-yil 13-yanvar kuni 11-son Bolalar musiqa va san’at maktabi hamda Temuriylar harbiy maktabi o‘rtasidagi hamkorlik asosida 14-yanvar — Vatan himoyachilari kuni munosabati bilan bayram tadbiri o‘tkazildi. Mazkur tadbirni tashkil etish jarayonida 11-son Bolalar musiqa va san’at maktabi tadbirning tashkiliy qismi uchun mas’ul bo‘lib, dastur asosida raqslardan iborat sahna chiqishlari, qo‘shiqlar hamda ansambl tomonidan ijro etilgan jonli musiqiy nomerlar namoyish etildi. Shuningdek, tadbirning badiiy qismi Temuriylar harbiy maktabi tomonidan tashkil etilib, unda turli sport musobaqalari, jang san’atlari elementlari, harbiy-amaliy mashg‘ulotlar va o‘zaro bellashuvlar o‘tkazildi. Ushbu chiqishlar tadbirning ma’naviy-ruhiy ahamiyatini yanada oshirib, yoshlar orasida vatanparvarlik ruhini mustahkamlashga xizmat qildi. Tadbir belgilangan dastur asosida, yuqori saviyada o‘tkazilib, ishtirokchilarda katta qiziqish uyg‘otdi hamda yosh avlodni Vatanga sadoqat, jasorat va fidoyilik ruhida tarbiyalashda muhim ahamiyat kasb etdi.

Bugun 2026-yil 2-fevral kuni Samarqand viloyati Pastdargʻom tumani 11-son Bolalar musiqa va sanʼat maktabida «Bolalar musiqa va sanʼat maktablari» uchun belgilangan yangi oʻquv talablari yuzasidan seminar tashkil etildi. Mazkur seminar davomida musiqa va sanʼat maktablarida ishlab chiqilgan yangilangan oʻquv dasturi oʻqituvchilarga batafsil tanishtirildi. Seminarda taʼlim jarayonini zamonaviy talablar asosida tashkil etish, oʻquvchilarning ijodiy qobiliyatlarini rivojlantirish hamda dars samaradorligini oshirish masalalariga alohida eʼtibor qaratildi. Shuningdek, yangi oʻquv dasturining mazmuni, tuzilishi va amaliy qoʻllanilishi yuzasidan fikr-mulohazalar almashildi, oʻqituvchilar tomonidan taklif va tavsiyalar bildirildi. Seminar ishtirokchilari mazkur oʻquv dasturi bolalar musiqa va sanʼat maktablarida taʼlim sifatini yanada oshirishga xizmat qilishini taʼkidladilar.

Bugun 2026-yil 6-fevral kuni Toshkent shahrida o‘tkazilgan «Sehrli ranglar🎨» nomli respublika "Tasviriy Va Amaliy San’at" tanlovida 11-son Bolalar musiqa va sanʼat maktabi o‘quvchisi Allaberdiyev Quvonchbek faol ishtirok etib, o‘zining ijodiy ishlari bilan hakamlar hay’atining e’tiborini qozondi va tanlov yakunlariga ko‘ra faxrli III—o‘rinni🥉 egalladi. 🏆Oʻquvchimizning mazkur natijaga erishishda Ustozining hissasi katta bo‘lib, tasviriy san’at sinfi bo‘yicha birinchi toifali o‘qituvchi Qurbonov O‘tkir Abduvoyitovich tomonidan berilgan bilim va ko‘nikmalar muhim ahamiyat kasb etdi.